Të papjekurit

Flaka Surroi

Artikujt tjerë

• Ende po heshtim
• A edhe PTK-në doni me e falë, a?
• Dita historike
• Turp, për kë?
• Revolucionistët
• Habemus Populus*
• Lidershipi
• Kokat e mykura
• Vullneti që mungon
• Vendi i shakaxhinjve

Paramendoni kur shefi i grupit parlamentar i partisë më të madhe thotë se kosovarët janë dëshmuar se nuk dinë ta përcaktojnë interesin nacional dhe për këtë amerikanët duhet të na tregojnë çfarë duhet bërë, atëherë pse rri ai në Kuvend bashkë me shokët e tij të paaftë

Java e shkuar thuaja nisi një ditë më herët – ndërmjet së shtunës dhe së dielës në Mitrovicë u vra me një bombë terroriste një burrë, baba i katër fëmijëve, që së bashku me nënën e tyre pësuan lëndime nga shpërthimi. Për krejt ne ishte e qartë se ky ishte një sulm, i cili synon spastrimin e veriut nga heronjtë e vërtetë të kësaj Kosove të mjerë – ata që në kushte anormale dhe pa mbrojtje rrinë në shtëpitë e veta.



Se sa të mjerë jemi tash kemi mundur ta kuptonim gjatë gjithë javës – të gjitha institucionet “dënuan aktin”, kush nga ana tjetër e Atlantikut, kush nga siguria dhe rehatia e zyrës me kolltukë të bardhë, pa u lodhur madje as për ta bërë përpjekjen për të shkuar në veri dhe duke ia lënë këtë detyrë ministrit që rastësisht e ka shtëpinë në Suhadoll, Rexhepit. Çfarë do të duhej të ndodhte në Mitrovicë e që Jahjaga të shkonte te “Tre Rrokaqiejt” për t’u treguar njerëzve atje se dikush megjithatë është me ta? A nuk e kishte rendin që të shkonte e t’u tregonte se deklaratat e stilit “ngjarjet në Mitrovicë nga fundjava janë të papranueshme për Kosovën” kanë vërtet kuptim, e nuk janë vetëm pallavra boshe me të cilat përmbushet norma e botimit të komunikatave. Është paksa ofenduese të shohësh sesi e përmbylli obligimin kur dy-tri ditë më vonë gjeti kohë të shkonte në Shtërpcë në njëfarë panairi, përderisa njëkohësisht ia ndau 5 mijë euro ndihmë familjes Haradinaj.



Kushtetuta e definon postin e saj si simbol uniteti – këtë është dashur ta dëshmonte në terren, te “soliterat” e Mitrovicës, duke treguar se ajo është kryetarja e të gjithëve, e posaçërisht e atyre që ne si shoqëri i kemi lënë pas dore. Po të kishte shkuar atje, i kishte dëshmuar edhe KFOR-it edhe EULEX-it se përderisa ka përfaqësues institucionesh kosovare që rrezikojnë jetën me vetë shkuarjen në veriun e ndarë me dhunë, ka motiv dhe arsye për ta që të veprojnë kundër dhunuesve dhe kriminelëve që e mbajnë qytetin e ndarë me dhunë.



Me shkuarjen e saj do ta eliminonte argumentin e përjetshëm që e nxjerrin nga mënga të huajt – do t’ua thoshte qartë se ky nuk është provokim, por është obligim ndaj qytetarëve, të cilëve u rrezikohet, madje edhe u mohohet e drejta për jetën. Po të shkonte atje, atëherë do të dëshmonte se qytetarët do të duhej të ndiheshin të sigurt se shteti do t’i mbronte po qe nevoja dhe se nuk do të duhej ta dëgjonin këshillën e kryetarit të Komunës se “pragun e shtëpisë duhet mbrojtur vetë”.



Një veprim të ngjashëm, moral e burrnor është dashur ta ndërmerrte edhe kryeministri me ndërprerjen e vizitës së tij “historike” në Amerikë. Dhjetë ditë shëtitjeje për t’i marrë porositë dhe afirmimet që edhe ashtu i thuhen për çdo ditë sa qëndron në Prishtinë. Sepse, kështu do ta thoshte shefi i grupit të tij parlamentar në Kuvend, po e parafrazoj: ...përderisa nuk jemi në gjendje të vlerësojmë vetë, dhe të dallojmë interesin nacional, kemi nevojë për amerikanët që të na tregojnë se çfarë duhet bërë... E situata edhe më e nderë e sigurisë e ka merituar një qasje shumë më serioze të këtij kryeministri dhe  të kësaj Qeverie, që do të shkonte përtej shprehjes së ngushëllimeve në televizion ose në mbledhje të Qeverisë.



Në provim ra edhe Kuvendi – me refuzimin e dhënies së nënshkrimeve në një kërkesë që të diskutohej për situatën në veri. Janë posaçërisht dëshpërues deputetët e partive të mëdha PDK dhe LDK. Nëse vërtet janë të brengosur për situatën në veri, është dashur të pajtoheshin me seancën e jashtëzakonshme, për të dëgjuar kryeministrin, ministrin e Brendshëm e mbase edhe shefin AKI-t në seancë të mbyllur. Për të marrë vendime, nga të cilat do të varej qasja jonë e ardhshme ndaj veriut. Po qe se nuk do të kishin qenë të kënaqur me përmbajtjen e propozim-vendimit nga VV-ja, nuk do ta votonin, dhe kaq. Por do të tregonin përgjegjësi në momentin kur do të shqyrtonin një problem kronik që ka arritur në pikë kritike.



Kësaj radhe “ngelaq” u dëshmua edhe kryeparlamentari, i cili kërkoi që sigurimi i Kuvendit t’i largonte dy deputetë nga salla. Dy deputetët e VV-së që mbanin pankartën me emrat e dy viktimave të fundit të veriut. Përderisa grupi i tyre parlamentar do të mund të akuzohej edhe për shfrytëzimin e emrave të tyre për afirmim dhe fitim të poenëve politikë, megjithatë ftesa që dikush që i takon ekzekutivit të vijë për t’i larguar ata që janë përfaqësuesit e sovranit nga shtëpia e tyre është skandaloze. Nuk do të kishte shkelje më flagrante të Kushtetutës sesa kjo, dhe u bë shumë mirë që kjo nuk ndodhi, sepse ishim bërë hor edhe pak si shtet – tamam për të treguar se sa të papjekur jemi.



E pse ka qenë e nevojshme që çështja të debatohej në Kuvend, e dëshmoi edhe qasja aq joserioze e Qeverisë ndaj vrasjes dhe rrezikimit të jetëve në Mitrovicë, kur u nis për ta vendosur një barakë, që as për shitje të bukës nuk do të shërbente, e të cilën sa “çel e mshel” sytë e demoluan, siç do të thoshte zëdhënësi i Policisë, ndërmjet 50 dhe 100 serbë. Diqysh 100-i është dyfishi i 50-it, e do të duhej të ishte lehtë të dallohej edhe me sy. Por kjo tregon se edhe madje përgatitja e kësaj deklarate ka shkuar si e gjithë puna në veri: shkel e shko.



Pamjet që kishte sjellë ekipi i KTV-së nga vendi i shpërthimit tregonin për nja katër a pesë policë të forenzikës që kryenin hetimin e vendit të ngjarjes. Nuk e di nëse aty kanë qenë edhe policët e EULEX-it, shefat e të cilit nuk u dëgjuan të kishin dënuar aktin, pavarësisht faktit se nuk dihet se kush e ka shkaktuar. Po të kishte qenë viktima serb, me siguri se reagimi nuk do të mungonte dhe shqiptarët do të qortoheshin se pse si popull shumicë nuk kujdesen për popullin pakicë. Tronditja do të ishte e madhe, aq sa do të vinte ndonjë komunikatë nga Zyra e baroneshës Ashton, duke qarë për prishjen e stabilitetit rajonal të konsoliduar pas marrëveshjeve të arritura ndërmjet Beogradit dhe Prishtinës. Kështu, me viktimën shqiptare dhe me frikën se mos po përshkallëzohet situata, të nesërmen, pasi te ura dolën nja 100-200 shqiptarë (sa për ta imituar zëdhënësin e Policisë) për të protestuar a vrojtuar, patrullat e EULEX-it u vizatuan menjëherë te vendi, sepse “kishin dëgjuar se diçka do të ndodhte”. Se mos pahiri shqiptarët po kalojnë matanë urës e po u komplikohet rehatia. E mandej po u dhemb kur po i kritikojmë...



E nuk ka ditë që nuk kalon e që nuk të japin arsye të bollshme për t’i kritikuar. Hera e fundit ndodhi hiç më larg se pardje. Në mbledhjen e kotë të Këshillit kombëtar kundër korrupsionit, ku nga ana e kosovarëve nuk u dëgjua asnjë fakt, kurse nga të huajt se EULEX-i ka arrestuar prokurorin Mustafi, doli në pah zëvendësshefi i misionit evropian, Andy Sparkes. Pos që e lavdëroi fjalimin e ambasadorit amerikan (“nuk ka pasur kurrë fjalim më të mirë kundër korrupsionit” – thuajse fjalimet janë mjeti me të cilin duhet luftuar korrupsionin), na e paraqiti mjetin tjetër me të cilin do të luftohet korrupsioni: mostrën e bluzave me numrin e Agjencisë Kundër Korrupsionit, që do të shpërndahen falas.



Kështu, iu bashkua korit gazmor ndërkombëtar që për temë ka kapur “këngën kundër korrupsionit”, duke qenë ata, në një formë apo tjetrën, bashkëpërgjegjës për nivelin kaq të lartë të korrupsionit dhe krimit të organizuar. Siç u tha te pjesa që u referohet amerikanëve, përderisa kosovarët nuk e kuptojnë se interes nacional është mos me vjedhë, këtë duhet t’ua bëjë me dije Amerika; sa i përket Evropës, është më se e qartë – është një mision i shtrenjtë, që ka shumë para, por pak vullnet për të kryer punën (për 3 vjet ka gjykuar 46 raste dhe i ka në procedurë hetimi 90 raste korrupsioni dhe krimi të organizuar); e sa i përket Feithit, mbikëqyrësit të pavarësisë – ai është përgjegjës që ka lejuar të shkelet Pakoja e Ahtisaarit e me të edhe Kushtetuta. Për shembull, Pakoja as që nisi të zbatohej në veri... e as që do të nisë së zbatuari në kohën kur Feith do të largohet prej këtu në shtator. Shembulli tjetër thotë se Pakoja parashihte zgjedhje demokratike, realiteti dëshmoi vjedhje votash, Feithi heshti para hajnisë dhe lejoi që të krijohej një Kuvend, legjislatura e të cilit tash merret me ndryshimet Kushtetuese – në mënyrë po aq jodemokratike sikurse i ka miratuar ligjet e Pakos.



Pra, për të bërë pak memorie, kthehemi një vit pas dhe te zarfi i famshëm. Ndodh një marrëveshje jashtëparlamentare ndërmjet tri partive politike për zgjedhjen e shefit të ri të shtetit, ku tre liderë partiakë pajtohen që të ketë ndryshime kushtetuese që do të shpijnë te zgjedhja e kryetarit të ri të shtetit brenda 18 muajsh. Kjo tash është shumë evidente se nuk do të ndodhë, ashtu siç e kemi paralajmëruar me muaj të tërë, për shkak se kryeministri i tanishëm është i interesuar të garojë, dhe natyrisht të fitojë, në një situatë ku gjasat janë se do të kemi katër palë zgjedhje brenda të së njëjtës ditë.



Skenari do të mund të ishte ky: së pari, partia më e madhe do ta vonojë miratimin e reformës zgjedhore edhe për së paku një vit, me ç’gjë edhe po të kalonin amendamentet kushtetuese, do të ishte e pamundur të mbaheshin zgjedhjet, sepse mungon mekanizmi. Më pas, Qeveria ose do të dorëhiqej, ose PDK-ja do ta shtynte AKR-në që t’ia bënte një mocion mosbesimi sikur herën e shkuar, e më pas do t’i obligonte deputetët e vet që ta votonin shkarkimin e vetvetes. Në vijim, do ta kalonte pakon e amendamenteve kushtetuese, përfshirë edhe amendamentin X – dhe kjo i jep një argument të fuqishëm që t’i prishë mandatet edhe të kryetarëve të komunave e edhe të kuvendeve komunale, dhe që ta obligojë Jahjagën që t’i shpallë të gjitha zgjedhjet për një ditë – sepse, të brengosur për t’u treguar sa më nikoqirë dhe për ta ruajtur buxhetin, kjo do të ishte zgjidhja më e mirë. Natyrisht, sa më shumë hallakamë dhe mjegull, aq më të mëdha shanset për të vjedhur vota.



Pra, teknikisht do të mund të ndodhte që nga fundi i vitit 2013 t’i kemi “katër në një” (zgjedhja e kryetarit, zgjedhjet parlamentare, komunale dhe për kryetarë të komunave). Deri atëherë do të ketë përfunduar autostrada e kombit dhe do të ketë nisur ajo për në Shkup – si dy arritje të mëdha infrastrukturore që do ta shterin buxhetin, të cilat do të shërbejnë për realizimin e spoteve politike zgjedhore dhe premtimeve të reja për një të ardhme të papërsëritshme euroatlantike. Pak do të ketë rëndësi nëse do të ketë siguri dhe mbikëqyrje të votimit në terren.



Natyrisht, kjo është një mundësi që nuk duhet përjashtuar, marrë parasysh se Kuvendi momentalisht është duke kaluar nëpër procesin e futjes së amendamenteve prej kornerit dhe me insistimin e amerikanëve, thuhet. Pra, futjen e amendamentit X, i cili parasheh shkurtimin e mandatit aktual të kryetares. Që është në kundërshtim me rregullat juridike dhe në kundërshtim me vetë Kushtetutën, sepse mandati i saj është megjithatë mandat i fituar në formë të drejtë, duke i respektuar procedurat kushtetuese dhe ato të Kuvendit. Por, Kushtetuta jonë është “tepih” (siç e quajti zëvendëskryeministri Kuçi) të cilin e shkel kushdo. E që shkelet edhe në këtë formë, nuk ka gajle, sepse edhe ashtu duket se nuk mbeti kush pa e shkelur. Dhe për ta bërë punën hala më tragjike, sipas këtij amendamenti, mundësi konkurrimi do të kenë edhe ata që e kanë shkelur Kushtetutën...



... E jo tepih, por leckë do të na bëhet Kushtetuta nëse ky version kalon. E gjasat janë se do të kalojë, për shkak se kuvendarët ende nuk dinë të përcaktojnë “se cili është interesi ynë kombëtar”... Çfarë mjerimi, çfarë papjekurie. E nëse nuk e kuptojnë pse janë të ulur në ata kolltukë të Parlamentit, pse rrinë aty? Përgjigjja është e thjeshtë: për të na marrë në qafë!



flaka@koha.net

Komente (14)Shpërndaje artikullin

• 16:17Kryeministri Thaçi udhëton sonte në Bruksel
• 16:09OVL: Rasti “Kleçka”, i motivuar politikisht
• 15:59Me kërkesë të Thaçit shtyhet ratifikimi i marrëveshjes
• 15:57Në Shtedim të Podujevës në aksident trafiku vdes 11 vjeçari
• 15:51Festivali i Butrintit, rikthehet pas dy vitesh
• 15:45Presidenti Nishani në vizitë zyrtare në Izrael
• 15:30 Prifti bekon tunelin e Qafë Krrabës
• 15:15Paulinho pranë Tottenhamit
• 15:15Juventusi kompleton transferimin e Pelusos
• 15:13Besiktasi me ofertë për Ronaldinhon