Pronari i “SharrCemit”, importuesi më i madh i çimentos

Kukës, 2 gusht - Heqja e tarifës së çimentos prej 35 për qind ka kthyer në punë pikën gati të fjetur doganore në Morin, meqë dhjetëra kamionë me afro 4.500 tonë çimento kanë kaluar të mërkurën nga Shqipëria në Kosovë. Madje doganierët në Morin e kanë krahasuar ditën e 1 gushtit  me atë të hapjes së tunelit të Kalimashit, më 25 qershor të vitit 2009, dhe 11 qershorin e këtij viti kur u vendos taksa e çimentos më 9 tetorin e vitit 2009, kur u mbyll tuneli i Kalimashit.

”Është një sukses i madh heqja e taksës. Dogana e Morinit pas 11 qershorit ishte kthyer si para ndërtimit të autostradës, ose më saktë si pas mbylljes së tunelit të Kalimashit  më 9 tetor të vitit 2009”, thotë Xhelal Hoxha, përgjegjës turni në doganën e Morinit.

Hoxha sqaron në vazhdim se deri në orën 12:00 të së mërkurës kanë hyrë në Kosovë 60 kamionë të ngarkuar me çimento me një sasi prej afro 1800 tonë, ndërkohë që janë porositur dhe priten të vijnë gjatë ditës së sotme edhe 90 kamionë të tjerë.

”Rreth 100 kamionë me çimento që do të hyjnë të mërkurën në Kosovë janë porositur për t’u ngarkuar në  kompaninë ‘Antea Cement’ në Fushë-Krujë, pronë e ‘Titan Group’, ndërsa 50 kamionë janë të ‘Fushë-Kruja Cement Factory’, që transportohen nga firmat ‘Besimi Comerce’ dhe ‘Euro-Albi”, thotë përgjegjësi i turnit në doganën e Morinit.

Por zyrtari i kësaj dogane, Xhelal Hoxha, thotë se porosia për çimento do të ishte më e madhe se 150 kamionë, por kjo është e kushtëzuar me orarin e punës në doganë, ku në bazë të Kodit Doganor veprimet në pjesën e Shqipërisë kryhen nga ora 08:00 deri në orën 20:00 të mbrëmjes, ndërsa në pjesën e Kosovës nga ora 08:00 deri në orën 19:30 të mbrëmjes.

Por ndryshimi midis doganës së Morinit dhe asaj të Vërmicës është se në Morin veprimet vazhdojnë po të jenë në proces, ndërsa në Vërmicë ato ndërpriten. Duke pritur fluksin në rritje të eksportit të çimentos për në Kosovë, dogana e Morinit dhe ajo e Vërmicës  kishin marrë masa për të eliminuar radhët e gjata dhe pritjet e kamionëve e autocisternave të ngarkuar me çimento.

”Kamionët e kompanisë ‘Besimi Comerce’ që ka ekskluzivitetin për importin e çimentos nga ‘Fushë-Kruja Cement Factory’ kryen procedura të përshpejtuara në Vërmicë në bazë të një marrëveshjeje të këtij subjekti me doganën e Kosovës ku likuidimi i pagesave doganore kryhet  on-line”, sqarojnë  zyrtarët në doganën e Morinit.

Gëzimin dhe entuziazmin për heqjen e tarifës së çimentos e ka shprehur  edhe biznesmeni Besim Gashi, pronar i kompanisë “Besimi Comerce”, i cili gjendej të mërkurën në Morin. Ai ka falënderuar të gjithë faktorët që kanë denoncuar, siç ka thënë, padrejtësitë e Ministrisë së Tregtisë dhe Industrisë.

Lidhur me faktin se “Antea Cement”, pronë e “Titan Group” në Shqipëri po eksporton më shumë çimento se përpara vendosjes së tarifës, Gashi ka thënë se ”Titan Group” ka fabrikat në Greqi, Shqipëri, Kosovë, Maqedoni, Serbi etj.

“Tashmë kompania ‘SharrCem’, pronë e “Titan Group” nuk ka monopolin e çimentos kështu që kërkon të ruajë tregun në Kosovë nëpërmjet importit”, ka thënë Gashi.

Vendosja e tarifës prej 35% për çimenton e importit nga MTI-ja e Kosovës e çoi gati në zero eksportin e çimentos nga Shqipëria në Kosovë. Kjo masë e ndërmarrë nga ministrja Mimoza Kusari-Lila shkaktoi reagime të përfaqësuesve të biznesit, politikës dhe sindikatave në Kosovë e Shqipëri. Përfaqësuesit e sindikatave të pavarura në Shqipëri gjatë një proteste të realizuar në Tiranë e kanë akuzuar ministren Mimoza Kusari-Lila për veprime korrupsioni në dëm të punëtorëve shqiptarë të çimentos.

Gjatë 2 viteve të fundit çimentoja e Fushë-Krujës zë vendin e parë në gamën e artikujve që eksportohen nga Shqipëria në Kosovë, ndërkohë që në vitin 2011, eksporti i çimentos është më shumë se i dyfishuar krahasuar me vitin 2010. Gjatë vitit 2011 janë eksportuar në Kosovë nga firma “Fushë-Kruja Cement Factory” 264.480 tonë çimento. E krahasuar me vitin 2010 ka një rritje prej 144.797 tonësh ose 1.2 herë më shumë. Edhe në gjashtëmujorin e parë të vitit 2012 importi nga Shqipëria ka vazhduar të dominojë, pasi janë importuar 102 mijë tonë çimento.

 

Komente (6)Shpërndaje artikullin

• ALL140.1
• MKD61.5
• USD1.30
• CHF1.25
• GBP0.87

• 11:18Hoxhaj vlerëson përkrahjen e Irlandës për perspektivën evropiane të Kosovës
• 11:17Serbia ndërpret financimin e policisë në Kosovë
• 11:16Vjet 162 milionë euro më pak investime të huaja në Kosovë
• 11:15Çiljeta Xhilaga nis pushimet me djalin
• 11:06Fotot e rralla nga D-Day, zbarkimi i Aleatëve në Francë
• 11:03Pengohet Kosova në takimin e CEFTA-s në Sarajevë
• 10:56Deputetët s’përfillin vendimet e Kushtetueses
• 10:53Shpërthim në veri të Mitrovicës
• 10:48Në Graçanicë u hap ekspozita e kolonisë së piktorëve
• 10:40Mbi dhjetë mijë turistë robër të vërshimeve